ကြုံမယ့်ကြုံတော့လဲ
မယုံတော့တဲ့ အခြေအနေကျမှ လာကြုံတယ်

ကိုယ်တကယ် ယုံသင့်တဲ့ဟာကို
ယုံချင်လွန်းလို့ မယုံချင်ဟန်ဆောင်နေခဲ့တာ
နှစ်ပေါင်း များစွာ အထပ်လိုက် ပုံခဲ့ပေါ့

ယုံလိုက်တော့မယ်
အဲ့ဒီလို ဟန်ချက်ပျက်ခဲ့
ယုံလိုက်တော့မယ်
အဲ့ဒီလို ရွဲ့စောင်းလုလု
ယုံလိုက်တော့မယ်
အဲ့ဒီလို စို့စို့ပို့ပို့
ယုံလိုက်တော့မယ်
အဲ့ဒီလို တစ်ကိုယ်လုံးစောင်းငန်းခဲ့

မယုံတော့ဘူး
ဘယ်တော့မှ မယုံတော့ဘူး
ကျောက်သားလိုခိုင်မာပြီလို့
ငါ ကမ္ဗည်းထိုးတော့မယ့်ဆဲဆဲကျမှ

ငါ..
ငြိမ်သက်ခြင်းနဲ့ မကြုံကြိုက်လိုတော့ပါ။ ။

ခင်အောင်အေး
၆၊ မတ်ချ်၊ ၂၀၁၂ ပါယားလေဘာ၊ စင်္ကာပူ ၁၀း၃၆ နာရီ

(ခေါင်းစဉ်မှာ မောင်သာရ လုံးချင်းဝတ္ထုတပုဒ်၏အမည်ကို ယူသုံးထားခြင်းဖြစ်ပါသည်)