ကလေးလေးတယောက်ကိုအိပ်ယာကနှိုးလိုက်ဖို့စောသေးတယ်

ဂျောက်ကနဲ တံခါးပိတ်သံ တဝေါဝေါ ရထားဖြတ်မောင်းသွားသံ

ချယ်နယ်နျူးအေးရှားသတင်းကြေညာသံတိုးသဲ့သဲ့

နေ့အသစ်တခုနဲ့ မိတ်ဖွဲ့ရတဲ့အခါတိုင်း

တွေ့ရတာဝမ်းသာပါတယ် (ဒါပေမယ့်) ထင်သလောက်မလွယ်ဘူး

အေယူဒီ ဇီးရိုးပွိုင့်အိတ်အိတ်ဇီးရိုးဖိုး စာတန်းတွေအကြောင်းလိုက်

အကြောင်းလိုက်ပြေးဝင်သွားတာ သက်ပြင်းမှုံမှုံကလေး နေရောင်စူးစူး

မိုက်ခွက်တွေ တပြုံလုံးအထိုးခံနေရသူကိုသနားရမလား ကိုယ့်ကိုယ်ကိုပဲ..

မီးလောင်နေတဲ့ ယောက်ယက်ခတ်မှုထဲမှာ မြောက်တက်

ပြာလို တအိအိ ပြန်ဆင်းလာခဲ့မယ်

ကတိစကားဟာ ခဏခဏလဲဝတ်တဲ့ တီရှပ်တွေ

စာသားနဲ့လူကိုတွဲချိတ်လိုက်ဖို့ လူတိုင်းလိုလားသလား ဆိုတော့

အအေးနဲ့ကိုက်ညှပ်ထားတဲ့ ပုံပန်းသဏ္ဍာန်

သဘာဝဟာချစ်စရာလား ကြောက်ရွံ့ထိတ်လန့်စရာဆီ

ပြက္ခဒိန်နဲ့ စကားပြောခြင်းများ စတင်ခဲ့ရာ သတ်မှတ်ချက်စကားလုံး

/အချိန်/

စခရင်မှာ ပေါ်နေတဲ့ စာသားအရဆိုရရင် အခုအချိန်ဟာ နံနက်ခင်း တဲ့

ပျော့ပျော့ကလေး ထိုးနှိုက်လိုက်တဲ့ စိတ်ထဲ သာယာမှုကို ထိစမ်းမိသေးလား

တထစ်ချင်းဖြုတ်ချလာခဲ့ရာ သန်းပေါင်းထောင်ပေါင်းများစွာ

ဖြစ်လိုက် ပျက်လိုက် ပြန်ဖြစ်လိုက် ပြန်ပျက်လိုက်

နောက်ထပ်ဖြစ်လိုက်ပျက်လိုက်တွေအနန္တ

လှုပ်ခါလိုက်တဲ့ ခွေးတကောင်ပေါ်က လွင့်ထွက်ကျလာတဲ့ ခွေးလှေးတွေပမာ

ယင်းတော်မလေးသည် မျက်စေ့တဖက်ပျက်နေသူ

အသက်ရှူရတာ အိုင်စကရင်စားနေရသလိုပဲ

ပွဖောင်းဖောင်း ( ပွယောင်းယောင်းဟုရေးလျှင်လည်းရ) လေအိတ်တွေ သီးပြွတ်နေလျက်

မိုးကောင်းကင်ဆိုင်ရာ ဒဿန ဟု လမ်းဖြတ်ကူးတော့မယ့် လူတယောက်ရဲ့ အပြော

လက်ထပ်လက်စွပ်ကို စမ်းမိတဲ့အခါ ရေချိုးခန်းပေါက်ဝမှာ ချော်လဲသူ

ပန်းတွေ အားပါးတရပွင့်နေတဲ့ ဥယျာဉ်ထဲ

အဘိဓါန်ကိုသုံးတယ်ဆိုလဲ စာလုံးပေါင်းမှန်မမှန်ကြည့်ရုံမျှသာ

တားကက်ကို ဒါရိုက်ဟစ် ခင်ဗျားဘာမှ စိတ်ညစ်မနေနဲ့တော့

ဗဟိုထိန်းချုပ်ခန်းက အော်တိုခလုပ်ကိုတင်လိုက်ပြီ

အခုအချိန်ကစပြီး အားလုံး အော်တို။ ။

ဒါေလးေတြလဲ ရွိေသးတယ္