PS:ဤ ဘလော့တွင် ဖော်ပြထားေသာ ဆော့ဝဲလ်များ ဘလော့နှင့် သက်ဆိုင်သော နည်းပညာများကို အခြားအခြားသော ဘလော့များ တွင်လဲ ဖော်ပြပြီး ဖြစ်ကောင်း ဖြစ်နိုင်ပါသည် ကျနော့ ဘလော့တွင် တင်ထားသမျှသည် ကျနော် လိုချင်သောအခါ အလွယ်တကူ ရရှိရန်နှင့် မရှိသေးသောသူများ အတွက် ရည်ရွယ်ပါသည်..။

“ဟိုး မိုးကောင်းကင်အစပ်မှာ ခပ်ရေးရေး လှမ်းမြင်နေရတာ ငါ့ ‘ငှက်ကလေး’ လား”

 ပြီးခဲ့တဲ့ မေ၊ ဇွန် လတွေမှာ ကိုယ်ဟာ PEN American က ကမကထ ပြုပြီးကျင်းပတဲ့ World Voice Literature Festive ကို တက်ရောက်ပြီး ကဗျာရွတ်ဆိုတဲ့ ကိစ္စ၊ ကဗျာ အကြောင်းဆွေးနွေးတဲ့ ကိစ္စတွေ အပြီးမှာ အဲ့ဒီမှာ အခြေစိုက်နေကြပြီဖြစ်တဲ့ နှစ်ပေါင်း များစွာ ကတည်းက ခင်မင်ရင်းစွဲရှိခဲ့သူ တချို့ကို အကြောင်းပြုပြီး ချက်ခြင်း မပြန်ပဲ US မှာ ရက်သတ္တပတ် အနည်းငယ်နေဖို့ ဆုံးဖြတ်ခဲ့ပါတယ်။ တကယ်တမ်း ကျတော့ ဟိုမှာ ရက်နည်းနည်း၊ ဒီမှာနည်းနည်းနဲ့ New York မှာ သိပ်မကြာလိုက်ပဲ၊ ညီမကြီး မေငြိမ်း ရဲ့ တစ်ချက်လွှတ် အမိန့်တော်အရ မေလ ကုန်ကာနီး နောက်ဆုံးပတ်မှာ ထင်ပါရဲ့၊ သူ နေထိုင်ရာ ဝါရှင်တန်မြို့နဲ့ မနီးမဝေးက Twin Brook ဆိုတဲ့ မေရီလင်းန်ဒ် ပြည်နယ် ထဲက မြို့ကလေးမှာ ရက်သတ္တပါတ် အတန်ကြာ တည်းခိုနေထိုင် မွေ့လျော်ခဲ့ရပါတယ်။ 

ကိုယ် သူ့အိမ်မှာ တည်းခိုနေခဲ့တဲ့ ရက်တွေ အတွင်းမှာပဲ၊ ကိုယ် မပြန်ခင် ရက်ပိုင်းမှာပဲ သူ့မွေးနေ့နဲ့ တည့်တည့်ကြုံကြိုက်တဲ့ အခါ ကိုယ့်မှာလဲ စာ လက်ဆောင်က လွဲလို့ဘာမှ ပေးနိုင်ခြေ မရှိတာမို့ “မေငြိမ်းအတွက် မထူမပါး အက်ဆေးတစ်ပုဒ်” ဆိုတဲ့ ခေါင်းစဉ်နဲ့ စကားပြေလေး တပုဒ်ရေးပြီး ပို့စ်တင်ခြင်းနဲ့ သူ့ကို မွေးနေ့ လက်ဆောင် ပေးခဲ့ပါတယ်။ ဒါပေမယ့် အဲဒီ ပို့စ်လေးထဲမှာပဲ -- 

“သူ့မွေးနေ့မှာ ကိုယ်ကလည်း ဘာမှ ထိုက်ထိုက်တန်တန်လက်ဆောင်ရယ်လို့မပေးနိုင် ပေမယ့် သူ့အိမ်ပရဝုဏ် သူ့ရိပ်မြုံကလေးမှာ ကိုယ် ကဗျာတွေ ရေးဖြစ်တာမို့ အဲ့ဒီ ကဗျာ တွေကိုသာ သူ့ကို လက်ဆောင်အဖြစ် ပေးချင်ပါရဲ့။ ရုတ်တရက်ဆိုတော့ e-Book ကလေး လုပ်ပြီးပေးချင်တာ၊ ချက်ခြင်းတော့ ဆန္ဒမပြည့်လောက်ဘူးထင်ပါရဲ့။ ဒါပေမယ့် လက်ဆောင် ဆိုတာလည်းစောတယ် နောက်ကျတယ် မရှိတာမို့ သူ့ network ကိုယ့် network ထဲက ဘယ်သူမဆို ဒီကိစ္စလေးဖြည့်ဆည်းဆောင်ရွက်ပေးဖို့ ပေါ်ပေါက်လာမယ် ဆိုရင်တော့ ဒီ E-Book ကလေး ဖြစ်မြောက်လာလိမ့်မယ်လို့ ယုံကြည်မြော်လင့်မိပါတယ်” 

 လို့ တကယ် စိတ်ထက်သန်မှုနဲ့ ရေးခဲ့ပေမယ့်၊ ဇွန်လ ၂၄ ရက်နေ့ ကိုယ် ဘန်ကောက်သာ ပြန်ရောက် လာတယ်။ အကောင်အထည်တော့ မပေါ်နိုင်ခဲ့ပါဘူး။ ကိုယ့် တိုင်တည်မှု ကိုတောင် ကိုယ် သံသယ ဖြစ်မိပါရဲ့။ ဒါနဲ့ ဇူလိုင်လရဲ့ ရက်တွေထဲမှာ တင်မင်းထက်ကို e-book ကလေး တခု လုပ်ပေးနိုင်မလား လို့လှမ်းမေးတော့ သူက အားတက်သရောနဲ့ အာမဘန္တေခံခဲ့ပါတယ်။ ဒါနဲ့ ကိုယ် ကဗျာလေးတွေ ရွေးကြည့်ပါတယ်။ မေရီလင်းန်ဒ်မှာ နေခဲ့စဉ်ကာလ ကဗျာအတော် များများ ရေးဖြစ်ခဲ့တဲ့ အထဲက အမှတ်တရဖြစ်အောင် အဲဒီကဗျာတွေကို e book လုပ်မယ်လို့ ရည်ရွယ်ခဲ့ပေမယ့် ခက်တာက ကိုယ်က စိတ်နဲ့ငြိရင် ငြိသလို ဘယ်နည်းနာနဲ့ မဆို ကဗျာ ကို ကောက်ရေး တတ်တာမို့ ကဗျာ အမျိုးအစားတွေက အမျိုးမျိုးဖြစ်နေတဲ့အပြင် ‘နှစ်ကာလများ’ ကနေပြီးတော့ ကိုယ့်လုံးချင်း ကဗျာစာအုပ်လေး တစ်အုပ်ဖြစ်မြောက်ဖို့လဲ စိုင်းပြင်းနေတဲ့အချိန် ဖြစ်တာမို့ အဲဒီ စာအုပ်အတွက် ကဗျာတွေ ယူလိုက်ပြန်တော့ e book အတွက် သိပ်မကျန် တော့ဘူး ဖြစ်သွားပြန်ရော။ ဒါနဲ့ e book ဖြစ်မြောက်ရေးဟာ ကိုယ့်ဟာကိုယ် ရှုပ်ထွေးမှုတွေ နဲ့ပဲ ကြန့်ကြာပြီး ဗမာပြည်ကို ပြန်ဖို့ အကြောင်းက ဖန်လာ၊ အင်တာနက် အဆင်မပြေလို့ တင်မင်းထက် နဲ့လည်း အဆက် အသွယ်ပြတ် ဖြစ်ကုန်ပြီး ‘သာ၍ ဝေးရာဆီသို့ပါ’ ဆိုတဲ့ တက္ကသိုလ် ဘုန်းနိုင် ဝတ္ထုခေါင်းစဉ် အတိုင်း ဖြစ်ခဲ့သပေါ့။ 

ဒါနဲ့ပဲ ဟိုအစ ဆွဲလိုက် ဒီအစ လွတ်လိုက်နဲ့ တိုတိုပြောရရင်တော့ စက်တင်ဘာလ ထဲသာ ရောက်လာခဲ့တယ် e-book က အကောင်အထည် မပေါ်လာခဲ့ဘူး ဆိုပါတော့။ အဲဒီ ကြားထဲ မှာပဲ ပန်ဒိုရာနဲ့ ချက်တင် စကားပြောဖြစ်ရာမှာ ကိုယ့် ငှက်ကလေး ကဗျာတွေကို အင်္ဂလိပ်လို ဘာသာပြန်ပေးဖို့ သဘော တူညီမှုရခဲ့ပါတယ်။ သူ့ဆီက ခပ်မြန်မြန် ဘာသာပြန်ပြီးသားတွေ ကိုယ့်ဆီ ရောက်လာ တဲ့အခါမှာတော့ ကိုယ်ဟာ ဒီ ငှက်ကလေး ကဗျာစုကိုပဲ e book အဖြစ် လုပ်ဖို့ ရုတ်တရက် ချက်ခြင်းပဲ ဆုံးဖြတ်ချက် ချလိုက်နိုင်ပါတယ်။ ဒါနဲ့ လူမြင်ကွင်းမှာသာ အကောင် အထည်ပေါ် မလာသေးပေမယ့် နောက်ကွယ်မှာ ညီ လင်းထက်နဲ့လွဲလိုက်မိလိုက်နဲ့ ‘ငှက်ကလေး’ ဟာ e book အသွင်ကို ဆောင်ဖို့ရာ အကြမ်းထည်ကလေး ပြီးစီးခဲ့ပါတယ်။ ဒီအချိန်မှာပဲ ကေသွယ်ရဲ့ မွေးနေ့ဖြစ်တဲ့ ဇူလိုင် ၃၁ ရက်နဲ့ တိုက်ဆိုင်နေပြန်တာမို့ သူ့ကို ပါ နှစ်စဉ် ပေးနေကျ အတိုင်း ကဗျာ လက်ဆောင်လေးပေးဖို့ သတိရသွားပြီး ရည်ညွှန်းစာ ကလေးပါ ထည့်သွင်းပြီး အဲဒီ အကြမ်းထည် ကလေးကိုပဲ သူ့ဆီ မေးလ်ကနေပို့ဖြစ်ခဲ့ပါရဲ့။ မေငြိမ်းဆီကိုတော့ အချောပြီးမှ ပို့စ်တင်ပြီး အံ့သြ ဝမ်းသာစေမယ်လို့ စိတ်ထဲကကြိတ်ပြီး တွေးထားလိုက်ပါတယ်။ ခုလောက်ကြာသွားလိမ့်မယ်လို့လဲ မထင်မိပဲကိုး။ 

 ဒီလိုနဲ့ပဲ အဲဒီ အကြမ်းထည် ငှက်ကလေး ကနေ အချောဘဝကို ကူးပြောင်းဖို့ နောက်ထပ် ရက်သတ္တပါတ်တွေ စိတ်ရှည် လက်ရှည်ကျော်လွှားရပြန်ပါတယ်။ ဒီကြားထဲမှာ သြဂတ်စ်လ ၂၂ နဲ့၂၃ နေ့တွေမှာ ဘန်ကောက်မြို့တော်ရဲ့ အထင်ကရဖြစ်တဲ့ Ramkhamhaeng Uni – versity မှာ အာဆီယံ အဆင့် ကဗျာဆိုင်ရာညီလာခံ တစ်ခုကို တက်ရောက်ပြီး ကဗျာရွတ်ဆို ဖို့ကြုံကြိုက် လာပြန်တော့ အဲဒီပွဲမှာ တက်ရောက်လာကြတဲ့ ကဗျာဆရာ စာရေးဆရာတွေကို အမှတ်တရလည်းဖြစ် ကိုယ့် ကဗျာရေးပုံကို ရိပ်စား မိစေချင်တာနဲ့ ဒီ အကြမ်းကလေးကိုပဲ အုပ် ၂၀လောက် ပရင့်ထုတ်ပြီး ဝေငှဖြစ်ခဲ့ပါတယ်။ ဒီအထိလည်း ငှက်ကလေးဟာ အချော ထည်ဘဝကို ရောက်လာဖို့ ဝေးနေဆဲပါပဲ။ ညီလေး လင်းထက် ခမျာလည်း တစ်နေ့ကုန် အလုပ်လုပ်ရ၊ အိမ်ပြန်ရောက်ချိန်က ညတိုင်း ည ၁၀ နာရီမှ။ ဒါကို သိနေတော့ ကိုယ်ကလဲ သိပ်ပြီး တွန်းတွန်းတိုက်တိုက် မပြောချင်တော့ပဲ ငှက်ကလေး အပြီးသတ်ချောမွေ့ဘို့အရေး ဟာ နှေးတုံ့လေးလံနေရပြန်ပါတယ်။ ဒါနဲ့ နောက်ဆုံး တင်မင်းထက် ကိုပဲ အားနာနာနဲ့ ဒီအကြမ်းထည် ကလေးကို ပြန်ချောပေးဖို့ အပူကပ် ရပြန်ပါတော့တယ်။ လင်းထက် ဆီက ကိုယ် ပြင်ချင်တာလေးတွေ ပြန်ပြင်ပြီး ပို့ပေး လာတဲ့အခါ ကျတော့ တင်မင်းထက် ကလည်း သူ Touching လုပ်ထားတဲ့ Proof ကလေး လှမ်းပို့လာပါတယ်။ ဒါနဲ့ပဲ ငှက်ကလေးဟာ တရွေ့ရွေ့နဲ့ Publish လုပ်နိုင်တော့မယ့် အခြေအနေနဲ့ နီးကပ်သထက် နီးကပ် လာပါတော့ တယ်။ 

ဒီကြားထဲမှာ ငှက်ကလေးရဲ့ ကံဇာတာ တက်လာပြန်တာက၊ စာအုပ်ဝေငှလိုက်တဲ့ အထဲက Chulalongkorn Unversity လက်အောက်ခံ Art of Faculty ရဲ့ Department of Compa- Rative မှာ သင်ကြားပို့ချနေတဲ့ Associate Professor Dr. Trisil က ငှက်ကလေးကို သိပ် သဘောကျသူ တစ်ယောက်ဖြစ်ပြီး ကိုယ့်ကို Chulalongkorn ကို အလည်လာဖို့ email နဲ့ ဖိတ်ကြားခဲ့တယ်။ အဲ့ဒီ တွေ့တဲ့နေ့မှာပဲ သူ့ PhD တန်းကျောင်းသားတွေနဲ့ Undergraduate ကျောင်းသားတွေကို ကဗျာနဲ့ ပတ်သက်တဲ့ အတွေ့အကြုံ၊ ဗမာကဗျာ/စာပေနဲ့ပတ်သက်တာ၊ ဟောပြောပေးဖို့နဲ့ ကိုယ့်ရဲ့ ငှက်ကလေး ထဲက ကဗျာတွေ ရွတ်ပြဖို့ ဖိတ်မန္တက ပြုခဲ့ပါတယ်။ဒီအကြောင်းကို ကိုယ့်ရဲ့ တောင်တောင်အီအီ အတွေးများ မှတ်စု မှာ ရေးအုန်းမှာမို့ ထားခဲ့ပါ အုန်းမယ်။ ဟောပြောရမှာကလည်း ဒီနေ့သိ၊ နောက်နေ့ ဟောပြော ဆိုတော့ တင်မင်းထက် ကို အချော မပြီးသေးဘူးလား မမေးသာတော့ပဲ။ ဒုတိယမူကြမ်း (Proof) ကိုပဲ ပရင့်ထ် ထုတ် ပြီး ကျောင်းသားတွေကို ဝေငှဖို့ စီစဉ်လိုက်ရပါတယ်။ ခုလို အထင်ကရ တက္ကသိုလ်တစ်ခုမှာ ကိုယ့်ကဗျာတွေ ရွတ်ဆိုခွင့် ရခဲ့ခြင်းဟာ ငှက်ကလေးက ကိုယ့်ကို တုံ့ပြန်ဆောင်ကြဉ်းပေးတဲ့ အဖိုးမဖြတ်နိုင်တဲ့ လက်ဆောင် တစ်ခုလို့ ကိုယ်ခံယူမိပါရဲ့။ 

ဟော အခုတော့ဖြင့်၊ ‘ငှက်ကလေး’ ဟာ ခင်ဗျားတို့ ဖတ်ဖို့ အဆင်သင့်ဖြစ်နေခဲ့ပါပြီ။ ငှက် ကလေး စင်ပေါ်ရောက်လာဖို့ ထစ်ငေ့ါကြန့်ကြာခဲ့တာတွေကို အဆိုးမြင်စိတ်နဲ့ ဖော်ကောင် လုပ်ခဲ့တာ မဟုတ်ပဲ၊ ကိုယ့်ရဲ့ ကံကြမ္မာကိုယ်က ကဗျာစာအုပ် လုပ်ဖို့ဆို အမြဲနှောင့်နှေးတတ် တာကို ပေါ်လွင်စေချင်တာ တစ်ကြောင်း၊ လူများစုဟာ စင်ပေါ်မှာ က ပြ အသုံးတော် ခံနေတဲ့ ဇာတ်ကွက် ဇာတ်လမ်း ကိုသာ မိန်းမောကြည့်ရှု ဆုံးဖြတ် တတ်ကြပြီး ကန့်လန့်ကာ နောက် ကွယ်မှာ ဒီလို တင်ဆက်က ပြနိုင်ဘို့ ဘယ့်ကလောက် ပြင်ဆင်ရ၊ အခက်အခဲ တွေကြုံရတယ် ဆိုတာ သိနိုင်ခဲ တဲ့ လူ့သဘာ၀ တစ်ခု ကိုလည်း ပြောပြပြီး ဖြစ်စေချင်လို့ပါ။ ငှက်ကလေး ကဗျာ တွေ ဘယ်လို စ မြစ်ဖျားခံပြီး ရေးဖြစ်တယ် ဆိုတာတော့ e book ကလေးရဲ့ အမှာစာမှာ ပါပြီး မို့ ထပ်ပြီး မရေးတော့ပါဘူး။ ဒီစာအုပ် ရည်ညွှန်းချက်မှာ ပါတဲ့ မေငြိမ်းနဲ့ ကေသွယ် တို့တင်မက ကိုယ့် စာဖတ်သူများ အားလုံးလည်း ငှက်ကလေး နဲ့ အေးအေးဆေးဆေး တွေ့ဆုံနိုင်ကြပါပြီ။ ခုလို တွေ့ဆုံနိုင်ဘို့မှာ အင်္ဂလိပ်  ဘာသာပြန်ဆိုပေးတဲ့ ပန်ဒိုရာ၊ စာအုပ်အဖြစ် ဖန်တီးပေးကြ တဲ့ ညီလေး လင်းထက်နဲ့ တင်မင်းထက် တို့ကို အပေါ်ယံနှုတ်ပြော မဟုတ်ပဲ ရင်ထဲအသည်း ထဲက လှိုက်လှိုက်လှဲလှဲ ကျေးဇူးတင်ပါကြောင်း ကွန်ပြူတာထက် အက္ခရာ တင်ရင်းဖြင့် -- 

ခင်အောင်အေး ၁၃ စက်တင်ဘာ ၂၀၁၃ ဖရာ့ပရာဒင်န်၊ ဘန်ကောက် ၀၄း၄၉ နာရီ 

Download Link: http://www.scribd.com/doc/168135439/Little-Bird

မြန်မာ့အလှ မြန်မာ့ရှုခင်း မြန်မာ့ယဉ်ကျေးမှု မြန်မာ့ မြင်ကွင်းတွေကို ဝေဝေဆာဆာနဲ့ လှပစွာ ရိုက်ကူးထားပြီး ဂျာမနီ နိုင်ငံ တဝှမ်းနဲ့ ဥရောပ တဝှမ်း မြန်မာကို သိအောင် ရိုက်ကူး တင်ဆက်ထားတဲ့ ဂျာမနီမှာ နိုင်ငံပိုင် တီဗွီလွှင့် ဌာနတွေကနေ လွှင့်ထုတ်ပေးနေတဲ့ စီးရီး ဇာတ်လမ်းတွဲ တွေထဲက တစ်ခုဖြစ်တဲ့ အိပ်မက်ဟိုတယ် ဇာတ်လမ်းတွဲမှာ ပြီးခဲ့တဲ့ ဇန်နဝါရီလ ၄ ရက်နေ့က စပြီး အိပ်မက်ဟိုတယ်(မြန်မာပြည်) ကို ထုတ်လွှင့်ပေးသွားတာကို ကိုယ့် ရွှေမြန်မာတွေ ကြည့်စေချင်လို့ ပြန်ပြီး တိုက်ရိုက် ကြည့်နိုင်အောင် တင်ပေးလိုက်ပါတယ်.. 

၂၀၀၉ ခုနှစ်လောက်မှာ ကဗျာတွေ ပြန်ပြီး ရေးဖြစ်တော့ ညီလေး လင်းထက်ရဲ့ဘလောက်မှာ ကဗျာတွေ တင်ဖြစ်တယ်။ ကိုယ့်ရဲ့ တစ်ကျော့ပြန်ကဗျာဘဝမှာ အွန်လိုင်း ညီအကို မောင်နှမ တချို့ဟာ အတော် အရေးကြီးခဲ့ပါတယ်။ ဥပမာ မောင်ဖုန်းမြင့်၊ အိန္ဒြာနဲ့ တည်ရ တို့ကို မဖြစ် မနေ ထည့်ပြောရမှာပါ။ သူတို့အပြင် အခု ဒီကဗျာလေးကို မွေးနေ့လက်ဆောင်အဖြစ်ပေးဖို့ ဆုံးဖြတ်မိတဲ့ ကေသွယ်လဲ အပါအဝင်ပေ့ါ။ 

သိပ်ရှည်ရှည်ဝေးဝေး ဇာမချဲ့တော့ပဲ ခြုံ့ပြောရရင်၊ အဲဒီတုန်းက ကိုယ် သိသိမှတ်မှတ် ဖတ်ဖြစ်တဲ့ ဘလော့တွေထဲမှာ ကေသွယ့် ဘလော့ဟာ ထိပ်ဆုံးနားက ပါခဲ့တယ်။ ဘယ်လိုက ဘယ်လို စပြီး စကားပြောဖြစ်၊ သိကျွမ်းခင်မင်သွားခဲ့မှန်းမမှတ်မိပေမယ့်၊ သူ့ရဲ့ ပို့စ်တွေထဲက ဘလော့ဂါတွေ အမိမြေမှာ ပြန်ဆုံကြတာကို စိတ်ကူးယဉ်ရေးထားတဲ့ ပို့စ်ကလေးကတော့ အရင်ဆုံး စိတ်ထဲ ငြိကပ်ခဲ့တဲ့ ပို့စ်တခုဆိုတာ သေချာတဲ့ အပြင်၊ ၂၀၁၁ ဒီဇင်ဘာမှာ မမြော်လင့်ပဲ ဗမာပြည်ပြန် ဖြစ်စဉ်၊ ကိုယ်နဲ့တစ်ခါမှ မမြင်ဖူးခဲ့တဲ့ အွန်လိုင်းမိတ်ဆွေ လင်းထွေးသော်၊ မိုးမခလှိုင်၊ ဗညားဦး တို့နဲ့ ဆုံဖြစ်ပြီးမရောက်တာ ကြာပြီဖြစ်တဲ့ ကိုယ်တို့က ရာဇူးလို့ နှုတ်ကျိုးနေတဲ့ ရန်ကုန်တက္ကသိုလ် ကျောင်းဝင်းထဲ အတူတူ သွားရောက်လည်ပတ် လွမ်းဆွတ်ငေးမျောမိ၊ အင်းယားကန်ပေါင်ဖက်ဆီထိ ထွက်ပြီးဘူးသီးကျော် ရခိုင်မုန့်တီတွေ စားဖြစ်တဲ့အထိ လက်တွေ့ဖြစ်မြောက်သွားတဲ့ အချိန်မှာ သူ့ကို ဖျတ်ကနဲ သတိရလိုက်မိသေးတယ်။ ဒါပေမယ့် အဲဒီအချိန်မှာ အကြောင်းကြောင်းအားလျော် စွာသူနဲ့ကိုယ်နဲ့ကြား အဆက်အသွယ်ဟာ ဟိုတုန်းကလို မဟုတ်ပဲ အားလျော့ ကျဲပါးနေခဲ့တာမို့ ဒီအကြောင်းကိုလဲ သူ့ဆီ ဖောက်သည် မချမိခဲ့ဘူး။ သုံးလေး နှစ်ဆိုတဲ့ အချိန်ကာလဟာ ဘာမှ မဟုတ်ဘူးဆိုလဲ ဘာမှ မဟုတ်ပဲ၊ တစ်စုံတစ်ရာဆိုလဲ အဲ့ဒီတစ်စုံတစ်ရာဖြစ်မြောက်ဖို့ကောင်းစွာ လုံလောက်တဲ့ အချိန်ကာလ အတိုင်းအတာ တစ်ခုပါပဲ။ 

ကိုယ့် ကဗျာပြန်ရေးဖြစ်ခြင်းအကြောင်းနဲ့ပတ်သက်ပြီး နည်းနည်းထပ်ချဲ့ပြောရမယ်ဆိုရင် အဲဒီနှစ် ကာလ အပိုင်းအခြားတွေအတွင်းမှာပဲ ၂၀၀၉ နဲ့ ၂၀၁၀ မှာ ကိုးရီးယားကို ၂ ခေါက်၊ မနှစ်က၂၀၁၁ မှာ လန်ဒန်၊ ဖင်လန်နဲ့ပြင်သစ်မှာ ကဗျာဆိုင်ရာကိစ္စတွေ ရွတ်ဖြစ် ပြောဖြစ် ဆင်နွှဲဖြစ်ခဲ့တာ၊ခု ၂၀၁၂ မှာ ဂျာမဏီ ဘာလင်မြို့နဲ့ အိုင်ယာလန် ဒဗ္ဗလင်မြို့တွေမှာ ကျင်းပမယ့် ကဗျာပွဲတွေတက်ရောက်ဖို့ ဖိတ်ကြားခံရပြီး လာမယ့် ၁၅ ရက်မှာ ဂျာမဏီကို ထွက်ခွာမယ့်ဆဲဆဲ အကြောင်းတွေကို ကိုယ့်ဂုဏ် ကိုယ်ဖော် မသူတော်လုပ်တဲ့ အနေမျိုးမဟုတ်ပဲ ဒီခရီးအထိ လျှောက်လှမ်းမိသမျှမှာ ဒီလူတွေ အဓိက ပါဝင် ပံ့ပိုးမှု အကြောင်းတရားရှိခဲ့တယ်ဆိုတာ မှတ်တမ်းတင်လိုစိတ်နဲ့ အခုလို ထည့်ပြောဖြစ်ပါတယ်။

ဒီရက်မတိုင်ခင်လေးမှာပဲ နိုင်ငံခြားတိုင်းပြည်တခုမှာ လုပ်ငန်းတာဝန်ထမ်းဆောင်နေတဲ့ ကိုယ့်ကဗျာ မိတ်ဆွေ တစ်ယောက် ဘန်ကောက်ကို ရောက်လာတယ်။ သူ့ကို လက်ကျန် ကဗျာစာအုပ်ကလေး ၂ အုပ် (တစ်အုပ်က ပျော်ရွှင်ဘွယ်ရေးခြစ်ခြင်းများ) လက်ဆောင်ပေးဖို့ပြင်ဆင်ရင်း စာအုပ်ရှေ့ဆုံး မျက်နှာမှာ ဘလော့ဂါ Kay နဲ့ သူ့မိတ်ဆွေများ…. အစရှိသဖြင့် သူ့ကိုအဓိက ဦးတည်ပြီး ရည်ညွှန်း ချက် ပေးခဲ့တဲ့ စာသားလေးဖတ်မိရင်း သူ့ရဲ့ ဒီနှစ် မွေးနေ့နီးကပ်နေတာ သတိရမိသွားတယ်။ ဒါပေ မယ့် တကယ်တမ်း ကဗျာရေးဖြစ်မယ် မရေးဖြစ်ဘူး၊ သူ့မွေးနေ့ရယ်လို့ လက်ဆောင်ပေးဖြစ်မယ် မပေးဖြစ်ဘူးရယ်လို့တော့ တိကျသေချာမှု မရှိခဲ့သေးပါဘူး။ 

ခု ဒီစာရေးနေတဲ့အချိန် ကိုယ့်နောက်ကျောဖက် ဝရံတာမှာ မိုးဟာ သည်းကြီးမည်းကြီး သွန်ချသလို ရွာနေလေရဲ့။ ပြီးခဲ့တဲ့ ၂ နာရီ နီးပါးလောက်က မထင်မှတ်ပဲ ကဗျာတပုဒ် ရေးမိပြီး (ကဗျာတပုဒ်ရေး ဖြစ်တိုင်း ကိုယ့်ဟာကိုယ်တော့ ရေးကြီးခွင်ကျယ်အလုပ်တခု လုပ်ပြီးသွားတယ်လို့ မှားယွင်းမိုက်မဲ စွာ ယုံကြည်နေမိတုန်းပါပဲ)၊ ကဗျာရေးပြီးပြီးချင်းလိုလိုမှာပဲ လိုင်းပေါ်မှာ မတွေ့တာကြာပြီဖြစ်တဲ့ ကေသွယ့်ကို တွေ့လိုက်ရတယ်။ သူ့စတေးတပ်စ်ပြ အင်ဒီကေတာလေးက စိမ်းလို့။ ဒါနဲ့ပဲ သူ့ကို ဒီကဗျာလေး မွေးနေ့လက်ဆောင်ပေးဖို့ အမှတ်ရသွားတယ်။ တကယ့်အဖြစ်အပျက်တွေ ဆိုတာ ပြန်ပြောပြသူက သမာသမတ်ရှိစွာ အပိုအလို မရှိသလောက်ဖြစ်အောင် ဂရုတစိုက် ပြန်ပြောပြတဲ့ အပေါ်မှာ မူတည်ပါတယ်။ 

ဒီစာရေးနေတဲ့ အချိန်မှာ မိုးတွေ သည်းကြီးမည်းကြီးရွာနေတာ သက်သေ ပြပါလို့ တောင်းဆိုလာရင်တော့ ကိုယ့်ရိုးသားမှုကိုပဲ ကိုယ် တိုင်တည်ရမှာပါပဲ။ ရိုးသားမှုဆိုတာဟာ ကဗျာရေးခြင်း အလုပ်အပေါ်မှာ ကိုယ့်ရဲ့ အရေးတကြီး ဂရုဓမ္မ ထားရတဲ့ ကိစ္စဖြစ်သလို ကဗျာအပေါ် ရိုသေမှုဟာလည်း ကိုယ့်ရဲ့ ကဗျာဆရာဖြစ်နေခြင်းရဲ့ အသက်ကိစ္စပဲ လို့ ပြောခဲ့ပါရစေ။ နောက်ပြီး တော့ အနုပညာဆိုတာ ပင်ကိုယ်မူလကိုယ်၌ကိုယ်ကသိမ်မွေ့ရတဲ့ ကြားထဲမှာ ကဗျာကပိုပြီး သိမ်မွေ့ နူးညံ့တယ်လို့ ကိုယ့်ငါးချဉ် ကိုယ်ချဉ်လိုက်ပါရစေ။ 

ကေသွယ်ရေ.. 

မွေးနေ့မှာ ရွှင်လန်းချမ်းမြေ့စွာနဲ့ ရှေ့ဆက်လျှောက်လှမ်းရမယ့် ခရီးတွေအတွက် အားအင်တွေတိုးဖြည့် ရင်း၊ အနုပညာ (ကဗျာအပါဝင်) ကိစ္စများမှာလဲ ဒီထက်ဒီ ပို၍ပို၍ ထက်ရှတောက်ပသော အဆင်အသွေး များနဲ့ ယက်ဖောက်ထားတဲ့ အနုစာပေလက်ရာတွေ ရေးဖြစ် ပို့စ်တင်ဖြစ်ပါစေလို့ ဆုတောင်းမြင်ယောင် မိရင်း….. 

အညတြ ကဗျာလေးတပုဒ် မွေးနေ့လက်ဆောင်အဖြစ်ပေးပို့အပ်ပါတယ်။ 

အနုပညာ မောင်နှမများအဖြစ် အဓွန့်ရှည်တည်တံ့ရှင်သန်ရေးကို ရည်သန်လျက် - 

 ခင်အောင်အေး 

၂၉၊ ဇူလိုင်၊ ၂၀၁၂ ဖရာ့ပရာဒင်၊ ဘန်ကောက် ၂၂း၀၆ နာရီ 

(stone age – modern age) 

လမ်းတွေပေါ်မှာ မော်တော်ကားတွေ တရွေ့ရွေ့ 

သူတို့ အထက် ခေါင်းပေါ်မှာ မိုးသားတွေ ရွေ့နေပုံနဲ့ 

တရွေ့ရွေ့ ရှေ့တိုးသွားတိုင်း နောက်မှာ ကျန်ရစ်သလို

မြင်ရတဲ့ မြင်ကွင်းများ.. 

ငါ့အရှုံးကို ငါ ကျကျနနမြင်လိုက်ရတဲ့နေ့ကစပြီး 

အရွေ့ကို ငါ သတိမူမိတယ် ဒါဆို ငါဟာ ဂူ တစ်ဂူကိုလဲ မြင်မိတယ်ပေါ့။ 

ဂူထဲမှာ ငါဟာ င့ါကိုယ်ငါ ကိုယ်လုံးတီးတွေ့ရတယ် 

ငါ့ လက်ထဲမှာ တင်းပုတ်တစ်လက်နဲ့ ငါဟာ ဂူပေါက်ဝဆီ ငေးရီနေတယ်။ 

မီးကိုတွေ့ရှိပြီးတဲ့ ကာလမို့ ဂူနံရံမှာ အရိပ်တွေ ကခုန်နေတာရယ် အရိပ်ကို အမှီပြုပြီး 

ကျောက်သားလက်နက်နဲ့ကုတ်ခြစ်ပုံဖော်ထားတဲ့ ငါတို့ရဲ့နေ့စဉ်ဘဝပုံရိပ်တွေရယ်။

အပြင်မှာ မြင်ကွင်းတွေဟာ ဆိတ်ငြိမ်လွန်းတယ် လူးလွန့်လှုပ်ရှားနေတယ်လို့ 

ထင်စရာဆိုလို့ ငါလို အမွှေးအမြှင် ထူထူထဲထဲနဲ့ သတ္တဝါတွေပဲ ရှိတယ်။ 

လှုပ်နေတာဟာ တစ်စုံတစ်ရာပဲ၊ သစ်ပင်တွေ တောတောင်ရေမြေနဲ့ 

သက်မဲ့အရာတွေ အပေါ်မှာ ယုံကြည်ကိုးကွယ်မှုဟာ သံပခြုပ်တခုလိုပဲ။ 

ငါဟာ ဂူထဲက ဆတ်ကနဲ ရုန်းထွက်လိုက်တယ်။ ငါ့ ကိုယ်ပေါ်မှာ အဝတ်အစားတချို့ 

ဝတ်လျက်သားကို ငါ အဆန်းတကျယ် ဖြစ်လိုက်သေးတယ် စက္ကန့်ဝက်လောက်။ 

တီဗီမှာ ဒီနေ့ ဘန်ကောက်မြို့ မော်တော်ယာဉ်လမ်းကျော အခြေအနေနဲ့ 

ဒီကနေ့ ရာသီဥတု အနေအထား နေ့အပူချိန် ညအပူချိန် မိုးရွာနိုင်မှု ရှိမရှိနဲ့ 

မြစ်ရေကြီးနိုင်မှု ခန့်မှန်းချက်များ အဆက်မပြတ် တင်ဆက်နေတယ်။

မြင်ရတဲ့ မြင်ကွင်းများ ...

တရွေ့ရွေ့ ရှေ့တိုးသွားတိုင်း နောက်မှာ ကျန်ရစ်သလို 

သူတို့ အထက် ခေါင်းပေါ်မှာ မိုးသားတွေ ရွေ့နေပုံနဲ့ 

လမ်းတွေပေါ်မှာ မော်တော်ကားတွေ တရွေ့ရွေ့။ ။ 

ခင်အောင်အေး 

၂၉၊ ဇူလိုင်၊ ၂၀၁၂ ဖရာ့ပရာဒင်၊ ဘန်ကောက် ၁၉း၄၉ နာရီ

အားလုံးသော ကျွန်တော့် ဘလော့ဂ်လေးကို လာလည်ကြတဲ့ သူအပေါင်း ၂၀၁၂ နှစ်သစ် ကြီးမှာ လိုအင်ဆန္ဒတွေ တစ်လုံး တစ်ဝတည်း ပြည့်စုံနိုင်ကြပါစေလို့ ဆုမွန်ကောင်း တောင်းအပ်ပါတယ်..၊

ကျွန်တော်လဲ ဘလော့ဂ် မရေးတာ အတော်ကြာသွားပါပြီ အခု ၂၀၁၂ နှစ်သစ်ကြီးမှာ ဆော့ဖ်ဝဲလ်တွေ ပရိုဂရမ်တွေ အသစ်တွေ အပ်ဒိတ် တွေဖြစ်ကုန် ပါပြီ ဒါကြောင့် ကျွန်တော်လဲ အသုံးလိုလို့ သွင်းထားတာလေးတွေကို ပြန်လည် ဝေမျှပါရစေ....၊

အခု ပထမဆုံး ဝေမျှပေးခြင်တာက ကွန်ပြူတာအတွက် မရှိမဖြစ် လိုအပ်တဲ့ ဆော့ဖ်ဝဲလ် တစ်ခုလို့ ပြောလို့ ရတဲ့ Uniblue Power Suite 2012 လေးပါ သူက တစ်ခု Run လိုက်တာနဲ့ သူ့မှာ ပရိုဂရမ် ၃ ခု ပါပါတယ်..

Serials Key လေးတွေပါ ထည့်ထားလို့ Full Version အဖြစ် သုံးလို့ ရမှာပါ.. ကီး ထည့်နည်း အင်စတော လုပ်နည်း လေးတွေပါ အောက်မှာ ဗွီဒီယိုနဲ့ တင်ပေးထားပါတယ်ဗျာ...

Mirror လင့် ငါးခု ကနေ တင်ပေးထားပါတယ်.. ကိုယ်နဲ့ အဆင်ပြေမယ့် Mirror ကနေ ဒေါင်းကြပါ..။ပထမဆုံး လင့်ကို နှိပ်လိုက်တာနဲ့ နောက်ထပ် Page တစ်ခု ပေါ်လာပါမယ် ၅ စက္ကန့် စောင့်ပြီးရင် အပေါ်ဆုံး ညာဘက်ဒေါင့်မှာ SKIP ADD ဆိုတာ နှိပ်ပြီး ဖွက်ထားတဲ့ လင့်တွေ ကနေ ကိုယ်နဲ့ အဆင်ပြေရာကနေ ဒေါင်းကြပါခင်ဗျာ..။

PS: ဤ ဘလော့တွင် ဖော်ပြထားသော ဆော့ဖ်ဝဲလ် များ ဘလော့ဂ်နှင့်သက်ဆိုင်သော နည်းပညာများ ကို အခြားအခြားသော ဘလော့ဂ်များ တွင်လဲ ဖော်ပြပြီး ဖြစ်ကောင်း ဖြစ်နိုင်ပါသည် ကျွန်တော့်ဘလော့ဂ်တွင် တင်ထားသမျှသည် ကျွန်တော် လိုချင်သောအခါ အလွယ်တကူ ရရှိရန် နှင့် မရှိသေးသူများ အတွက် ရည်ရွယ်ပါသည်...။